باديوه


خير دی

نن خو په کړکۍ کې ودرېږه

ما

باديوه په هوا کړې

سره او سپينه

لکه ستا د ماشومتوب د وخت چترۍ

 

******************

مانا

 

 نن راووځه

د سپيدار سيوري ته

لنډه منډه په کوکيو پسې واخله

لمر ته په وياله کې ودرېږه

په وليو دې اوبه روانې کړه

ساه واخله

ټيټه شه يوه ګل ته

يو ماشوم په تندي ښکل کړه

په نينوپسې څوک ولېږه دکان ته  

ویښته خلاص پرېږده

لکه د وشنده پيغلوټو

زړه ته دې لار وباسه

سا واخله

له ژونده خپله

خپله مانا واخله